2Ti 2 | BEF | STEP | Pana'nimaka. Kai Yesu Kilisitotoga buto i hepi'ohuta'mu yabe luto lehe'mose'na limito lele'mo hetofa hulata nohina yamofihi komopa'agu minoto amuya moloto minobo.

2 Timothy 2

Yesu gimi mage'a hiti bo lamana'a minalinamofihi ka'a

1 Pana'nimaka. Kai Yesu Kilisitotoga buto i hepi'ohuta'mu yabe luto lehe'mose'na limito lele'mo hetofa hulata nohina yamofihi komopa'agu minoto amuya moloto minobo. 2 Silaga bona'magihi enubulo minoto kaga silaga'i fi lehe toto lu lepi'ohunamo yamofihi bona'i luga'amagi kumu kehelite amuya mele'ahana bona'i nehinogo ana kagaya lu hetofa hu epeletogo ana suhi hite bona'i lug'a kaga enelepilabe.

3 Kai Yesu Kilisitohi lusi gimi mage bo'a bati huto lolo huto nohitogo kai hiti kalana'i mele letalana'mu yabe luto kosele'i mekeheno. 4 Mone'amagi enali gimi mage bo lolo hilete foya'a li etalanamagi enugufamofihi foya melilana'mu yabe. To gimi mage bo lolo hilabe luto le'mo eto hu'ehina bo kaba bo'aniuba kehelinogo laga'a kehelilabe lite anamofihi foya'a lilanagihe. 5 To ana huto hololu lilanagu ya'ma bo moneuba ana yokolo'namofihi kaba bouba hololu nelana'mu lu laga hu'ehina ka'a hauta halina yamofihi mina'a huto mehilina'mu yabe. 6 To moneuba ai foya'a kafalube luto lili'na amuya moloto gobi nohenogo kafalina bouba legeya'a huto hinogo kohe toto lito nalube'mu hibe. 7 Ya'ma kaga lu nokumuna fono ka suhi yamofihi hapa'a kehelito le'mo eto hubo. Sipi Bouba kekesa kehelilatana lu hokolo hulenogo yamofihi asaga'na keheli bebe salane.

8 Kai Yesu Kilisito Tebitihi tata'afu yagi ai kumu kehelito beto huto minobo. Ai fili'ehinaguti aku ho ti'ehina bo yabe luto ai ka lamana'a lulatanamofihi ya'ma lu yege holata nohube. 9 Ka lamana'a yamofi kumu yabe luto amuya'a hiti nasana ligo kalana'i molo nete'ahana'mu keke'i luse'na kehelito kofilata nohube. Ya nohuto kegeiyo bo legi huto seni naga'i nimilago nohunaya Hu'mamofihi ka'a ya'ma naga'i meemi'ahanamo ni'ibe. 10 Yana'mu nani keke'i luse foya asaga'i Hu'mau enele'mo eto hu'ehina bona'i enali kumu yabe luto baga'a hiti nasana ya'ma kofilata nohube. Ya nohugo enali ya'ma Yesu Kilisitou enubuto bilata nohina to fana talina hiti mino kosaba huse'na ya'ma lilabe luto ya hulata nohube. 11 Kaga mone'a ma luto ni'ina yamofihi lusiga nolibe. Ai fili'ehinalo molo emi'ohuta ni'inogomo ya'ma ai hiti moneka minoto lito minalune. 12 Keke'i luse nasana lugupisalo notinogo yamofi kumu yabe luto kosele'i melehenogo fa'mene kofiluta ya'mu ai hiti hepito minoto ai kapolo kaba hilune'mu hune. Ai kumu lemegesa hu emilenogo ai ana suhi huto megesa hu limilina'mu yabe. 13 Lali ai kumu keheli amuya memalaluta ya'ma ai'a hapa'amu ligitagahi mehilina'mu yabe. Ai fa'mene lali kumu kaga molo'ehina'amofihi mehe'milina'mu yabe.

Hu'mau foya'amofihi ana'ina'mu kehelinogo bati hilina ka

14 Kai bonakamagihi ka ya'ma le'mo kosaba huto lu noepito Hu'mamofihi bu'alo ya'ma lipoti nokumunaga ma luto lu laga huto lu epibo. Fa'mene ka gusunupa'a meni'ina kagalo luba mehilo. Ana luba kauba ya'ma enegekesa yigi yigi hite liba liba nehago keheli'ahana bona'i enali enele'mo sibina hulata nohibe. 15 Hu'mau enali kumu kehelinogo bati hilibe luto amuya moloto minoto foya lilane. Ya nohuto Hu'mamofihi ka lamana'a fotogo huto lu noenelepito kubuya mehulata nasana ya'ma foyalo bo minalane. 16 To fato mono ka futu'a to hapa'a meni'ina ka'amofi kumu lite nelinogomo kenasabo bilete Hu'mamofihi kapoguti he'milina'mu yamofihi kemegesa hu emibo. 17 Ya'ma kaga futu'a fato bona'magi lu enelepise'nauba mele'isi hepuhi suhi huto sibina lolo huto mino lito buto asaga bonatoga napa huto buto lilube'mu hibe. Bona'i ya suhi hana'amagihi enalitogati Himenaiyo to Failetogo etali'ya neha'ibe. 18 Etali ya'ma ka lamana'amofihi kapo'a he'milete'atiti ya'ma lite nela'ibe: Lugufati fili'ehinaguti aho ti'ehinamo ni'inaya alihi kosaba lugufa hiti lele'mo ho tilina'a meni'ibe. To ya lilete mono ka keheli'ahana bona'i luga'a komopa'ani enele'mo sibina neha'ibe. 19 To Hu'mau lu molo'ehina kagamofihi lukesa kefatu fi'ehina suhi huto ule'ale nohinogo nasana moneuba le'mo mopo mopo mehilina'mu yabe. To ana lukesalo Hu'mau fayahi ya'ma luto koyo'ehinamo ni'ibe:Sipi Bouba ai yagapana'a bu enogo keheli bati hulata nohibe.To mone'i ya'ma luto koyo'ehinamo ni'ibe:Sipi Bomofihi gi'a helata nehana bona'i enali laga hina mehina nasana mele'isi he'mi su hete foipanamofihi enemegesa hi emilabe.

20 To mone kibina bomofihi nonugu lape'i fato fato'mofihi goli efatu to siliba efatu lolo hi'ahana lape'mo babu luto ni'ibe. To yafa lape'i hiti mesomo hiti ana huto ni'ibe. Nose nasana mone hetofa lapelugu melelata nehabe. To mone mina'a limi'ehinagu letuha'a melelata nehabe. 21 To bona'i mone'amagi ya'ma sibi sabana li he'milete ya'ma enali komopa'ani gulu gulu lilinamagi lape'i lamana'a suhi huto lolo hilenogo nohi afo'afu Hu'mau lusa gito enele'mo ho tito fi hetofa hulenogo fato fato foya yamofihi li etalune'mu habe. 22 To kaibe, neheya kola bo enali fato fato nasana'mu topa hilata nehana yamofihi kemegesa mele'isi hu emibo. Ya hulotoka ya'ma kaika to komopaka gulu gulu linogo Sipi Bomofihi buka tite hetofana lilune'mu lehe'mobo lilata nehana bona'i hiti lenali bebe sete fotogo lilatana, keheli amuya melelatana, lenemehi epilatana, fato bona'i enele'mo baba ite ya'ma koguna ilatana, ya'ma lolo huto minalune lite amuya malalo. 23 Ule'ale ka lite meluguti kifite nelana ka to negi nagi ka fa'mene kaga yamofihi kemegesa hu emibo. Yanamofihi legeya'a ya'ma lubana kenasabo bise'na ni'ina keheli'ahane. 24 To Sipi Bomofihi foya'alo bo enali hapa'ani hetofana ni'igo leli'ali hite luba kenasabo mebise asaga bonatoga amuya ka lite melise fulu kaguti mono ka enele'mo bebe sete enelepilata nehabe. 25 Enali mono kamu'i kenasabo bi'ahana'amagihi ya'ma fulu huto enele'mo bebe salabe. Hu'mau ai'a enele'mo lito limilenogo komopa'ani li gelehe hite ka lamana'a keheli bebe salafihe lite ya hi epalalune'mu habe. 26 Ana bona'magi Satau koyapa kelefu'agu enohoto ai mege'i malalabe luto naga'i epi'ehinamagi komopa'ani i gelehe hinogo to enegekesa hokolo hinogo Hu'mau Sataha naga'aguti enubuto bilina'mu yabe.